वाढत्या कोविड व एच३एन२ संसर्गाच्या पार्श्वभूमीवर राज्याचे माजी आरोग्यमंत्री डॉ. दीपक सावंत यांनी आरोग्य सचिव एन. नवीन सोना यांची जी. टी. हॅास्पिटल येथील त्यांच्या कार्यालयात नुकतीच भेट घेतली.
यावेळी महाराष्ट्र ग्रामीण भागात रूग्ण सापडू लागले आहेत. विशेषत: सांगली मिरज, बुलढाणा व इतरत्र रूग्णसंख्या वाढत आहे. आयसोलेशन बेडस आवश्यक आहेत, तसेच मुंबई, ठाणे येथेही रूग्णसंख्या वाढत आहे. दोनही महानगरपालिकांशी बैठका करून आढावा घेणे दररोज सुरू असल्याची माहिती एन. नवीन सोना यांना यावेळी त्यांनी दिली.
डॅा. दीपक सावंत यांनी सांगितले की, नागरिकांनी घाबरून न जाता स्वतःची काळजी घेणे गरजेचे आहे. विशेषकरून मॅाल, सिनेमाहॅाल व गर्दीच्या ठिकाणी मास्क वापरण्याविषयी सूचना सरकारने कराव्यात. ओमायक्रॅान एक्सबीबी १.१५ हा व्हेरिएंट सध्या भारतात आहे. यावेळी व्हायरस म्युटेट झाला तर होणारे परिणाम म्हणजेच लक्षणाच्या तीव्रतेवर लक्ष ठेवावे लागेल, अशी सूचना त्यांनी केली.
जीनोम सिक्वेसिंगचे रिपोर्ट लवकर व्हावे तसेच लॅब इन्व्हेस्टिगेशनसाठी अव्वाच्या सव्वा पैसे पेशन्टला मोजावे लागतात. त्यामुळे त्याला कॅप लावणे, कस्तुरबासह इतर ठिकाणी इन्व्हेस्टिगेशन माफक दरात वा मोफत होणे आवश्यक आहे, अशा सूचना त्यांनी केल्या. जनरल प्रॅक्टीशिनर्सना ट्रीटमेंट प्रोटोकॅाल दिल्यास व वेळेतच योग्य उपचार झाल्यास हॉस्पिटलायझेशन कमी होईल. तसेच ग्रामीण व निमशहरी भागात खाजगी हॅास्पिटल रूग्णांना राखीव बेडस आरक्षित करून ठेवाव्यात या सूचनांचे सचिव सोना यांनी स्वागत केल्याची माहितीही त्यांनी दिली.
