मेळघाटातील सिमाडोह प्राथमिक आरोग्य केंद्रात वॅार्मरची कमतरता लक्षात आल्यावर, राज्याच्या कुपोषण समितीच्या टास्क फोर्सचे अध्यक्ष डॉ. दीपक सावंत यांनी काल मुख्यमंत्री एकनाथ शिंदे यांच्या उपस्थितीत अमरावतीचे सिव्हील सर्जन यांना वॅार्मर मशीन सुपूर्द केले. यावेळी समीर शाह, सुभाष मेंगाणे, जय शाह आदी मान्यवर उपस्थित होते.
पावसाळयात थंड तापमान असते. त्यामुळे नवजात शिशू, जे कमी वजनाचे, अकाली जन्मलेले असतात त्यांना हायमोथर्मिया होण्याचा व त्यामुळे दगावण्याचा संभव असतो. याचवेळी जन्मत: कावीळही असते. अशावेळी या मशीनव्दारे उपचार होण्यास मदत होते. यापूर्वीही डॉ. सावंत यांनी सिमाडोह, साद्रावाडी, चिखलदरा येथे अशा मशीन दिल्या आहेत.
पावसाळ्यात विशेषत: हायपोथर्मियामुळे नवजात अर्भक क्रिटीकल होऊ नये, त्याचे शारीरिक तापमान संयमित राहावे व पुढील गुंतागुंत होऊ नये म्हणून डॉ. दीपक सावंत यांनी हे पाऊल उचलले. मुख्यमंत्री एकनाथ शिंदे यांनी कुपोषण निर्मूलन समितीच्या टास्क फोर्सच्या अध्यक्षपदी १९ जूनला नियुक्ती केली. त्यानंतर लगेचच त्यांनी पालघर, मेळघाटचा दौरा केला होता.
