गुढीपाडव्याच्या शुभमुहूर्तावर मुंबईतल्या श्री सिद्धिविनायक गणपती मंदिर न्यासातर्फे येत्या बुधवारी, म्हणजेच 22 मार्च 2023 रोजी सकाळी 11 ते संध्याकाळी पाच, यावेळी श्री चरणी भक्तांनी अर्पण केलेल्या सोन्याच्या अलंकारांचा जाहीर लिलाव केला जाणार आहे.
या अलंकारांमध्ये श्री गणेश प्रतिमा, लॉकेट्स, मोदक, अंगठ्या, साखळ्या, हार आदींचा समावेश आहे. लिलावासाठी उपलब्ध असलेले अलंकार लिलावाच्या दिवशी मंदिराच्या आवारात प्रदर्शनार्थ ठेवण्यात येतील. लिलावाची प्रक्रिया पूर्णपणे राज्य शासनाच्या नियमांप्रमाणे होईल. लिलावासंबंधीचे सर्वाधिकार न्यासाने राखून ठेवलेले आहेत. श्री सिद्धिविनायकाच्या भक्तांनी या लिलावात मोठ्या संख्येने सहभागी व्हावे, असे आवाहन न्यास व्यवस्थापन समितीने केले आहे.
