राज्यातील सर्व ३१ सरकारी रक्तपेढ्यांमधे रक्ताच्या लहान पिशव्या तयार करणारे अलिकॉट मशिन बसण्यात येईल, अशी घोषणा आरोग्यमंत्री तानाजी सावंत यांनी बुधवारी विधानसभेत केली. आमदार आशिष शेलार यांच्यासह अनेक आमदारांनी या संदर्भातील प्रश्न प्रश्नोत्तराच्या तासात उपस्थित केला होता.
सार्वजनिक आरोग्य विभागाच्या ३१पैकी केळ ८ रक्तपेढ्यांमधे सध्या हे मशिन उपलब्ध आहे. तसेच, वैद्यकीय शिक्षण विभागाच्या अखत्यारितील १४ रुग्णालयांपैकी केवळ तीन ठिकाणी हे मशिन उपलब्ध आहे, याकडे शेलार यांनी लक्ष वेधले होते. त्यावर उत्तर देताना मंत्री सावंत यांनी ही घोषणा केली. तसेच, सर्व रक्तपेढ्यांमधे मशिन बसवण्यासाठी लागणारी आर्थिक तरतूदही केली जाईल, अशी घोषणाही त्यांनी केली.
१० वर्षे जुन्या फाइलचे ट्रॅकिंग
देवयानी फरांदे यांनी त्यांच्या मतदारसंघातील रुग्णालयाचा प्रश्न उपस्थित करताना २०१३पासून प्रश्न प्रलंबित आहे, याकडे लक्ष वेधले. तसेच, या फाईलवर कोणता अधिकारी बसून होता, याची माहिती सभागृहाला देऊन त्याच्यावर कारवाई करणार का, असे विचारले. त्यावर आरोग्यमंत्री तानाजी सावंत यांनी या फाईलचा प्रवास २०१३पासूनचा आहे. त्यामुळे ती फाईल ट्रॅक करून त्याबद्दलची कारवाई केली जाईल, इतकेच उत्तर दिले.
मुंबईत ड्रग्जविक्रेत्यांचा सुळसुळाट
सुनील प्रभू यांनी मुंबई शहरामध्ये वाढत असलेल्या अंमली पदार्थाच्या, ड्रग्जच्या वाढत्या विक्रीबद्दलचा मुद्दा औचित्त्याच्या मुद्याद्वारे उपस्थित केला. हे ड्रगविक्रेते आणि त्यात सामील लोकांना पोलिसांची अजिबात भीती वाटत नाही आणि त्यांच्या जाचातून जनतेला मुक्त करण्यासाठी चोवीस तासात कारवाई करावी, अशी मागणी प्रभू यांनी केली. अध्यक्ष राहुल नार्वेकर यांनी सरकारला या विषयाची गंभीर दखल घेण्याचे निर्देश दिले.
जोगेश्वरी विक्रोळी लिंक रोडवरील तलावामध्ये हजारो मासे मृत होऊन दुर्गंधी पसरली आहे, याकडे रवींद्र वायकर यांनी लक्ष वेधले. दोन-तीन दिवसांपासून मासे मृत झाल्याने ही घाण काढण्याचे निर्देश दिले जावेत, अशी मागणी वायकर यांनी केली.
