प्रख्यात साहित्यिक विजय मडव यांना यंदाचा शारदा पुरस्कार देण्यात येणार असून जय महाराष्ट्र नगर भूषण पुरस्कार मागाठाणे मित्र मंडळाचे खंदे कार्यकर्ते दिलीप चव्हाण आणि वसंत सावंत यांना देण्यात येणार आहे.
मुंबई उपनगरातील रसिक श्रोत्यांना अविरत बौद्धिक मेजवानी उपलब्ध करून देणारे ज्येष्ठ पत्रकार विजय वैद्य यांनी यंदाच्या ४२व्या वर्षीच्या जय महाराष्ट्र नगर, बोरीवली पूर्व येथील वसंत व्याख्यानमालेत सालाबादप्रमाणे देण्यात येणारे शारदा पुरस्कार आणि जय महाराष्ट्र नगर भूषण पुरस्कार यांच्या नावांची घोषणा केली असून या वर्षापासून प्रेरणा पुरस्कारही देण्याचेही जाहीर केले.
यंदाचा पहिलावहिला प्रेरणा पुरस्कार विजय घरटकर यांना देण्यात येणार आहे. वायंगणकर साई स्पोर्ट्सच्या मल्लखांबपटू हर्षिता वायंगणकर हिने राष्ट्रीय स्तरावरील विद्यापीठ स्पर्धेत अभिमानास्पद यश संपादन केले असून या तिच्या यशाबद्दल तिलाही सन्मानित करण्यात येणार आहे. रविवारी, २६ मे रोजी प्रमुख अतिथींच्या हस्ते हे पुरस्कार प्रदान करण्यात येणार असल्याची माहिती संयोजक विजय वैद्य आणि प्रा. नयना रेगे यांनी दिली.