कुनो राष्ट्रीय उद्यानात नामिबियातून आणण्यात आलेल्या आशा नावाच्या मादी चित्त्याने तीन पिलांना जन्म दिला आहे.
केंद्रीय पर्यावरण, वने आणि हवामान बदल मंत्री भूपेंद्र यादव यांनी समाजमाध्यमांवर जारी केलेल्या संदेशात ही माहिती देण्यात आली आहे. त्यात म्हटले आहे की, कळवण्यास अत्यंत आनंद होत आहे, की कुनो राष्ट्रीय उद्यानात तीन नवीन छाव्यांचे आगमन झाले आहे. ‘आशा’ या नामिबियातून आणलेल्या मादी चित्त्याने या गोड छाव्यांना जन्म दिला आहे.
केंद्रीय मंत्री यादव म्हणाले की, भारतात वन्यजीव आणि पर्यावरण समतोल निर्माण करण्यासाठी पंतप्रधान नरेंद्र मोदी यांच्या संकल्पनेतून सुरू करण्यात आलेल्या प्रोजेक्ट चित्ता, या प्रकल्पाला मिळालेले हे घवघवीत यश आहे. या प्रकल्पात सहभागी असलेले सर्व तज्ञ, कुनो वन्यजीव अभयारण्याचे अधिकारी आणि देशभरातील वन्यजीव प्रेमी यांचे त्यांनी अभिनंदन केले आहे.
