ज्येष्ठ रंगकर्मी, अभिनेते आणि नाट्यदिग्दर्शक रामकृष्ण गाडगीळ यांचे रविवार दि. २६ फेब्रुवारी २०२३, रोजी वयाच्या ७८व्या वर्षी हृदयविकाराच्या धक्क्याने निधन झाले.
त्यांच्या निधनाने एक उत्कृष्ट अभिनेता, मार्गदर्शक आणि नाट्यदिग्दर्शक हरपल्याची भावना रंगभूमी, मालिका विश्वातील विविध मान्यवरांनी व्यक्त केली आहे. ‘प्रयोग मालाड’, ‘अमोघ मालाड’, ब्राह्मण सभा मालाड’, ‘अवतरण अकादमी मुंबई’ आदी संस्थांतून मुंबईच्या पश्चिम उपनगरात हौशी व प्रायोगिक नाट्यचळवळ सचेत राखण्यात त्यांचा मोलाचा वाटा होता. आंतर-बँक एकांकिका स्पर्धेत बँक ऑफ इंडियाचे प्रतिनिधित्व करून त्यांनी खूप मोठे योगदान दिले आहे.
व्यावसायिक रंगभूमीवर रामकृष्ण गाडगीळ यांनी भद्रकाली प्रॉडक्शन्स, सुयोग या संस्थांच्या वस्त्रहरण, ब्रह्मचारी, असा मी आसामी अशा विविध नाटकांमधून गाडगीळ यांनी उल्लेखनीय भूमिका केल्या. त्याचप्रमाणे अनेक मालिकांमध्ये त्यांनी अभिनय केला. क्राईम पेट्रोल, या हिंदी मालिकेमधील त्यांची चुकून पाकिस्तान हद्दीत गेल्यावर पाकिस्तान सैनिकांच्या तावडीत सापडलेल्या भारतीय नागरिकाची, “तुकाराम” या भूमिकेची खूप प्रशंसा झाली होती.
त्यांच्या मार्गदर्शनाने ऐंशी-नव्वदच्या दशकात अनेक नवोदित रंगकर्मी अशा संस्थांतून नाट्यकलेशी जोडले गेले व आज विविध माध्यमांत नावारूपाला आले आहेत.
