जुन्नरमध्ये 80 कोटी रुपयांची एक बिबट सफारी उभारली जात आहे. उद्योग खात्याकडून वन जमिनीसाठी मिळणाऱ्या जागा कोकणामधलीच मिळत होती हे लक्षात आल्यानंतर आता कोकणातली जागा घ्यायची नाही असा निर्णय झालेला आहे, असे वनमंत्री सुधीर मुनगंटीवार यांनी सांगितले.
वन्य प्राण्यांच्या हल्ल्यात मृत्यू झाल्यास २० लक्ष रुपयाची मदत दिली जात होती. या रकमेत वाढ करून २५ लक्ष रुपये देण्याचा निर्णय करण्यात येत आहे, अशी घोषणा वन मंत्री सुधीर मुनगंटीवार यांनी केली. वन्य प्राण्यांच्या हल्ल्यात जखमी झालेल्या व्यक्तीला सरकारी रुग्णालयात उपचारासाठी गेल्यास पाच लक्ष रुपयांची मदत तर खाजगी रुग्णालयात उपचार घेत असल्यास १ लक्ष २५ हजार रुपयांची मदत दिली जायची. आता वन्य प्राण्यांच्या हल्ल्यात जखमी व्यक्तीस कोणत्याही खाजगी दवाखान्यात उपचारासाठी पाच लाखापर्यंतची मदत देण्यात येत आहे, असेही त्यांनी या संदर्भातले विधेयक मांडताना स्पष्ट केले. हे विधेयक एकमताने मंजूर करण्यात आले.
रानडुक्कर, रोडी आदींना मारण्यासाठी 24 तासात परवानगी मिळते आणि जर कधी एखादा प्राणी नुकसान करत असेल तर त्यावेळीला परवानगीची वाट न बघता त्याला मारता येते असेही मुनगंटीवार म्हणाले. वाघाची संख्या महाराष्ट्रात इतकी वाढली आहे की आता वाघांना आपण दुसऱ्या जंगलामध्ये पाठवण्याचा प्रयोग करू लागलो आहोत. यातला पहिला प्रयोग नागझिराला झाला आहे. सह्याद्रीच्या जंगलामध्येसुद्धा वाघाचा कॉरीडॉर करता येतो का, या दृष्टिकोनातून चाचपणी चालू आहे.
