इन्स्टिट्यूट ऑफ चार्टर्ड अकाउंटंट्स ऑफ इंडिया (ICAI) संस्थेला सीए इन्स्टिट्यूटसाठी कल्याणमध्ये सरकारकडून जागा उपलब्ध झाली असून या १७ गुंठे जागेत सुसज्ज असं सीए इन्स्टिट्यूट उभं राहणार असून त्यासाठी सर्वतोपरी मदत करणार असल्याचे आश्वासन शिवसेनेचे खासदार डॉ. श्रीकांत शिंदे यांनी दिले.
डॉ. शिंदे यांनी संस्थेच्या वतीने कल्याण येथे आयोजित कार्यक्रमात काल भाग घेतला. तेव्हा ते बोलत होते. याप्रसंगी राज्याचे सार्वजनिक बांधकाम मंत्री (सार्वजनिक उपक्रम वगळून) रवींद्र चव्हाण, उल्हासनगरचे आमदार कुमार आयलानी, माजी आमदार नरेंद्र पवार, भाजपचे माजी नगरसेवक मंदार हळबे, राहुल दामले, शिवसेनेचे कल्याण पश्चिम शहरप्रमुख रवी पाटील यांच्यासह संजय पाटील, सीए मयूर जैन, राकेश अगरवाल, अमित मोहरे, विकास कर्मा, गिरीश थारवानी आणि कल्याण, डोंबिवली, उल्हासनगर, अंबरनाथ, बदलापूर शहरातील चार्टर्ड अकाउंटंट्स उपस्थित होते.
या इन्स्टिट्यूटमधून भविष्यात अनेक सीए घडतील. त्यातून देशाची अर्थव्यवस्था मजबूत होण्यास आणखी हातभार लागेल. इतकंच नव्हे, तर हे इन्स्टिट्यूट येथील सर्वात मोठं इन्स्टिट्यूट म्हणून ओळखलं जाईल, असा विश्वास त्यांनी यावेळी व्यक्त केला. चार्टर्ड अकाउंटंट देशाची अर्थव्यवस्था सुदृढ ठेवण्याचं काम करतात. त्यामुळे आज देश जगातली पाचवी मोठी अर्थव्यवस्था होत असताना यात चार्टर्ड अकाउंटंट्सचंही योगदान मोठं आहे, असं मतही डॉ. शिंदे यांनी व्यक्त केले.
