श्रीराम नवमीनिमित्त उद्या बुधवारी, १७ एप्रिलला सार्वजनिक सुटी आहे. असे असले तरी उद्या भायखळा येथील वीरमाता जिजाबाई भोसले वनस्पती उद्यान व प्राणिसंग्रहालय (पूर्वीची राणीची बाग) जनतेकरिता खुले राहणार आहे. मात्र, उद्या हे उद्यान खुले राहणार असल्यामुळे दुसऱ्या दिवशी म्हणजे गुरुवारी, १८ एप्रिलला ते बंद असेल, असे बृहन्मुंबई महानगरपालिकेकडून जाहीर करण्यात आले आहे.
भायखळा (पूर्व) परिसरातील वीरमाता जिजाबाई भोसले वनस्पती उद्यान व प्राणिसंग्रहालय साप्ताहिक सुट्टीनिमित्त दर बुधवारी बंद असते. मात्र, बृहन्मुंबई महानगरपालिकेने यापूर्वी मंजूर केलेल्या एका ठरावानुसार बुधवारी सार्वजनिक सुट्टी आल्यास त्यादिवशी उद्यान व प्राणिसंग्रहालय जनतेसाठी खुले राहते, तर त्याच्या दुसऱ्या दिवशी बंद ठेवण्यात येते. या ठरावानुसार उद्या, बुधवारी वीरमाता जिजाबाई भोसले वनस्पती उद्यान आणि प्राणिसंग्रहालय जनतेसाठी खुले राहणार आहे, असे पालिका प्रशासनाकडून स्पष्ट करण्यात आले आहे.
