राज्यातल्या महाविकास आघाडीतील घटक पक्षांची परस्परांवर कुरघोडी चालू असतानाच काँग्रेसमधले दोन नेते आज एकमेकांवर कुरघोडी करताना दिसून आले.
चंद्रपूरचे काँग्रेसचे जिल्हाध्यक्ष प्रकाश देवतळे यांच्या विरोधात काँग्रेसचे प्रदेशाध्यक्ष नाना पटोले यांनी केलेली कारवाई चुकीची असल्याचा दावा त्यांच्या समर्थकांनी केला. या दाव्यासह हे समर्थक काँग्रेसचे नेते विजय वडेट्टीवार यांच्याकडे गेले. नागपूरला त्यांच्या निवासस्थानी झालेल्या या बैठकीत पक्षाचे प्रदेश कार्याध्यक्ष सुनील केदारही सहभागी झाले.
त्यानंतर प्रसिद्धीमाध्यमांशी बोलताना वडेट्टीवार म्हणाले की, काँग्रेसच्या वरिष्ठ नेत्यांनी आपल्या जिभेवर नियंत्रण ठेवले आणि बोलण्यात संयम राखला तर महाविकास आघाडी अधिक चांगल्या पद्धतीने एकसंघ राहील. आज भाजपासह कोणत्याही पक्षाला स्वतंत्रपणे निवडणुका जिंकता येणार नाहीत. त्यामुळे महाविकास आघाडी ही आमची गरज आहे हे ओळखून प्रत्येकाने आपल्या जिभेवर संयम पाळला पाहिजे.
प्रदेशाध्यक्ष नाना पटोले यांना याबद्दल विचारले असता ते म्हणाले की, यावर बंद खोलीत चर्चा करता येईल. वडेट्टीवार इतके मोठे नेते नाहीत की त्यांच्यावर मी भाष्य करायला पाहिजे…
