ज्येष्ठ कामगार नेते शरद राव यांचे चिरंजीव, कामगार नेते तसेच जेडीयूचे माजी प्रदेशाध्यक्ष शशांक राव यांनी काल १ मे म्हणजेच महाराष्ट्रदिनी राज्याचे उपमुख्यमंत्री देवेंद्र फडणवीस यांच्या उपस्थितीत भारतीय जनता पक्षात प्रवेश केला. जानेवारीत शशांक राव यांनी जनता दल युनायटेडच्या प्रदेशाध्यक्षपदाचा व पक्षाच्या प्राथमिक सदस्यत्वाचा राजीनामा दिला होता.
पंतप्रधान नरेंद्र मोदींच्या कामाने प्रेरित होऊन आणि त्यांच्या नेतृत्त्वावर विश्वास ठेवत आपण भाजपमध्ये प्रवेश केला आहे. या पक्षप्रवेशामुळे कामगारांचे प्रश्न सोडविण्यास अधिक सुलभता येईल. त्यामुळे मी योग्य निर्णय घेतला आहे, अशी भावना शशांक राव यांनी यावेळी व्यक्त केली. भारतीय जनता पार्टीच्या विचारांनी प्रेरित होऊन आणि होत असलेल्या विकासकामांवर विश्वास ठेऊन आपण भाजपात प्रवेश केला आहे, असेही ते म्हणाले.
यावेळी खासदार पीयुष गोयल, खासदार मनोज कोटक, खासदार गोपाळ शेट्टी, विधानसभा अध्यक्ष राहुल नार्वेकर, आमदार आशिष शेलार, आमदार प्रवीण दरेकर उपस्थित होते.
