मुंबईतल्या दादर माटुंगा सांस्कृतिक केंद्राच्या वतीने सादर केलेला “साहित्यरंग महोत्सव” अतिशय रंगतदार झाला. ‘अनिकेत श्रीखंडे मेमोरियल ट्रस्ट’ने सहकार्य केलेल्या या महोत्सवाचे उद्घाटन ग्रंथालीचे संस्थापक दिनकर गांगल यांच्या हस्ते करण्यात आले. बालसाहित्यावर आधारित या साहित्यरंग महोत्सवासाठी बालकांची उपस्थिती लक्षणीय होती.
यावेळी स्वाती महाळंक यांनी ‘असे फुलले बालसाहित्य’ या विषयावर अतिशय अभ्यासपूर्ण व रंजक असे व्याख्यान दिले. त्यानंतर ‘किलबिल’ हा बालगीतांचा कार्यक्रम केंद्राच्या संगीत वर्गाच्या बाल विद्यार्थ्यांनी सुरेल आणि तयारीने सादर केला. ‘बालसाहित्याचा प्रवास’ या शीर्षकाअंतर्गत कथा, कविता, गीते, नाट्यछटा असे बालसाहित्याचे अनेक प्रकार विविध वयोगटाच्या मुलांनी अप्रतिम सादर केले. त्यानंतर विद्याधर गोखले लिखित ‘फुलवा मधुर बहार’ हे बहारदार बालनाट्य कलांगणतर्फे वर्षा भावे यांनी सादर केले. कलांगणच्या बालकलाकारांनी अभिनयाने आणि गाण्यांनी फार मजा आणली. नेपथ्यही साजेसे आणि सुंदर होते. महोत्सवाला बालांनी आणि मोठ्यांनीही उत्तम प्रतिसाद दिला.
