मुंबईतल्या गिरगाव चौपाटी येथील स्वराज्यभूमी, या लोकमान्य टिळकांच्या समाधीस्थानासमोर दैवज्ञ समाजाचे समाजश्रेष्ठी सुरेंद्र शंकरशेट यांच्या हस्ते स्वातंत्र्याच्या अमृत महोत्सवपूर्ती ध्वजारोहण काल करण्यात आले.
महानगरपालिकेच्या सुरक्षा दलाने यावेळी राष्ट्रगीत गाऊन शानदार सलामी दिली. ब्रिटिशांनी त्यावेळच्या लोकमान्य टिळक स्मारक समितीला अमर्याद लीजवर दिलेल्या जागेत ‘मेरी माटी मेरा देश’ या पंतप्रधान नरेंद्र मोदी यांच्या आवाहनाला प्रतिसाद म्हणून लोकमान्य टिळकांची पणती उज्ज्वला मेहेंदळे यांनी वृक्षारोपण केले. या जागेत असलेल्या उच्च न्यायालयाच्या उच्चाधिकार समितीच्या नियमावलीमुळे राष्ट्रपुरुषांच्या या आंतर्राष्ट्रीय दर्जाच्या स्मारक निर्मितीत अडचण येत आहे. येथे भूमिगत चित्रशिल्प व भव्य कृतज्ञता ध्वजस्तंभ उभारण्याचा स्वराज्यभूमी स्मारक समितीचा संकल्प आहे. ती योजना २०२०पासून शासनाकडे प्रलंबित आहे.
उच्चाधिकार समितीच्या नियमांचे पालन करीत लोकमान्य टिळक स्वराज्यभूमी स्मारक समिती समारंभाचे आयोजन करीत असते. समारंभाच्या व्यवस्थापनाची जबाबदारी मुंबई महानगरपालिका ड विभाग सांभाळत असते. राष्ट्रपुरुषांच्या समाधीस्थान परिसराची सुरक्षाव्यवस्था भडकमकर मार्ग पोलीसठाण्याचे वरीष्ठ पोलिस निरीक्षक विनय घोरपडे यांच्या नेतृत्त्वाखाली पार पडली.
