राज्यातल्या दहावीच्या विद्यार्थ्यांना परीक्षा अर्ज भरण्यास येत असलेल्या अडचणींचा विचार करून संबंधित परीक्षा मंडळाने अर्ज भरण्याची मुदत २५ जानेवारीपर्यंत वाढविली आहे. त्यामुळे विद्यार्थी आता २५ जानेवारीपर्यंत परीक्षा अर्ज भरू शकतील.
परीक्षा मंडळाने आज याबाबतचे परिपत्रक जारी केले. यापूर्वी परीक्षा अर्ज भरण्याची मुदत ११ जानेवारीपर्यंत होती. परिक्षेचे अर्ज भरताना विद्यार्थ्यांना तांत्रिक अडचणी येत होत्या. त्यात आज अर्ज भरण्याचा शेवटचा दिवस असल्याने विद्यार्थी चिंतेत होते. अनेक विद्यार्थी एकावेळेस अर्ज भरत असल्याने सकाळी १० वाजल्यापासून संबंधित वेबसाईट हँग झाली होती. त्यामुळे अनेक विद्यार्थ्यांची पंचाईत झाली. आज अर्ज भरण्याची शेवटची तारीख असल्याने विद्यार्थी, पालक, मुख्याध्यापक आदींनी अर्ज भरण्यासाठी मुदतवाढ देण्याची मागणी केली होती. त्यानंतर मंडळाने ही मुदतवाढ जाहीर केली. अर्ज भरण्याची प्रक्रियाही मजबूत करण्याचा प्रयत्न मंळाकडून होत असल्याचे सूत्रांनी सांगितले.
