रिपब्लिकन सेनेचे प्रमुख आणि इंदू मिल स्मारक लढ्याचे नायक असलेले डॉ. बाबासाहेब आंबेडकर यांचे नातू आनंदराज आंबेडकर अमरावती येथे लोकसभा निवडणूक रिंगणात उतरत आहेत. त्यांच्या या निर्णयाचे स्वागत करत बहुजन संग्राम संघटनेचे प्रदेशाध्यक्ष भीमराव चिलगावकर यांनी आनंदराज यांच्या उमेदवारीला पाठिंबा जाहीर केला आहे.
आनंदराज आंबेडकर यांना अमरावतीच्या अनुसूचित जाती राखीव मतदारसंघात महाविकास आघाडी आणि वंचित बहुजन आघाडी यांनीही पाठिंबा देऊन लोकसभेत निवडून पाठवावे, असे आवाहन चिलगावकर यांनी एका पत्रकाद्वारे केले आहे.
येत्या मंगळवारी २ एप्रिल २०२४ रोजी आनंदराज आंबेडकर अमरावतीत आपला उमेदवारीअर्ज दाखल करणार आहेत. त्यानंतर आपण स्वतः बहुजन संग्रामच्या प्रमुख पदाधिकाऱ्यांसह त्यांच्या प्रचार सभांसाठी अमरावतीत जाणार आहोत, अशी माहितीही त्यांनी दिली.
