Thursday, June 13, 2024
Homeमुंबई स्पेशलतरण तलावात आढळलेल्या...

तरण तलावात आढळलेल्या मगरीच्या पिल्लामागे स्थानिक?

मुंबईतल्या शिवाजी पार्क येथील महापालिका तरण तलावात सापडलेले मगरीचे पिल्लू कोणी सोडले हे अद्याप स्पष्ट झाले नसले तरी तलावाच्या जवळ असलेल्या खाजगी वन्यजीव संग्रहालयाविरूद्ध असलेल्या या परिसरातील लोकांचा हा डाव असल्याचा संशय व्यक्त केला जात आहे.

काल पहाटे साडेपाचच्या सुमारास दादर येथील महात्मा गांधी तरण तलाव परिसरातील ऑलिंपिक आकाराच्या जलतरण तलावात मगरीचे पिल्लू आढळून आले आहे. हे पिल्लू तज्ज्ञांच्या मदतीने पकडण्यात आले‌ असून ते वन खात्याच्या ताब्यात देण्यात आले आहे. हे मगरीचे पिल्लू तरण तलावात कुठून आले, याची चौकशी सुरू करण्यात आली असून आवश्यक ती प्रतिबंधात्मक काळजी भविष्यात घेण्यात येईल, अशी माहिती उपायुक्त (उद्याने) किशोर गांधी यांनी दिली आहे.

याबाबत अधिक माहिती देताना जलतरण तलाव व नाट्यगृहांचे समन्वयक संदीप वैशंपायन यांनी सांगितले की, रोज पहाटे तरण तलाव सदस्यांसाठी सुरू करण्यापूर्वी संबंधित कर्मचाऱ्यांद्वारे तरण तलावाचे काळजीपूर्वक निरीक्षण करण्यात येते. यानुसार काल पहाटे साडेपाचच्या सुमारास तरण तलावाचे निरीक्षण करीत असताना ऑलम्पिक आकाराच्या व शर्यतीसाठीच्या तरण तलावात (Olympic size Racing Swimming Pool) मगरीचे पिल्लू आढळून आले. त्यानंतर तज्ज्ञांच्या मदतीने तत्काळ कार्यवाही करीत हे पिल्लू सुरक्षितपणे पकडण्यात आले. हे पिल्लू नंतर वन खात्याच्या ताब्यात देण्यात आले.

ही घटना घडल्यानंतर हे मगरीचे पिल्लू तलावात कसे आले हा प्रश्न मुंबईकरांना भेडसावत होता. त्यातच महाराष्ट्र नवनिर्माण सेनेचे नेते संदीप देशपांडे यांनी प्रथम या खाजगी वन्यजीव संग्रहालयाकडे सर्वांचे लक्ष वेधले. येथून हे पिल्लू आले असावे, असा संशय त्यांनी व्यक्त केला. त्यानंतर येथील अनेक रहिवाशांनी तशी शक्यता व्यक्त केली. हे संग्रहालय खाजगी असले तरी ते अधिकृत आहे. त्यामुळे त्यांच्याविरोधात सरसकट कारवाई करता येणे अशक्य आहे. हे पिल्लू आपले असल्याचा व्यक्त करण्यात आलेला संशय संग्रहालयाच्या चालकांनी फेटाळून लावला आहे. परंतु, हे संग्रहालयातले पिल्लू असले तरी ते नेमके या तरण तलावात गेले कसे हा प्रश्न अनुत्तरीतच राहतो. सूत्रांच्या म्हणण्यानुसार, या परिसरातल्या लोकांचा या संग्रहालयाला विरोध आहे. नजीकच्या काळात मुंबई महापालिकेच्या निवडणुका होणार आहेत. इतरही निवडणुका डोळ्यासमोर आहेत. अशावेळी या परिसरातली मते सुनिश्चित करण्यासाठी आता अनेक राजकीय नेते पुढे येण्याची शक्यताही वर्तवली जात आहे.

Continue reading

गिनीज बुक ऑफ वर्ल्ड रेकॉर्डने घेतली झोमॅटोची नोंद

भारतातील फूड-ऑर्डरिंग प्लॅटफॉर्म, झोमॅटोने डिलिव्हरी पार्टनर्सना जीवन वाचवणारी महत्त्वपूर्ण कौशल्ये शिकवण्यासाठी आयोजित केलेल्या पहिल्या कार्यक्रमाची गिनीज बुक ऑफ वर्ल्ड रेकॉर्ड नोंद घेतली आहे. सर्वात मोठ्या प्रमाणात प्रथमोपचार प्रशिक्षण कार्यक्रम एकाच छताखाली एकाच वेळी केल्याचा हा कार्यक्रम मुंबईतल्या नेस्को, गोरेगाव येथे आयोजित करण्यात...

राज्यसभेसाठी राष्ट्रवादीकडून सुनेत्रा पवार

राष्ट्रवादी काँग्रेसचे कार्याध्यक्ष खासदार प्रफुल पटेल यांनी दिलेल्या राजीनाम्याने रिक्त झालेल्या राज्यसभेच्या जागेसाठी होत असलेल्या पोटनिवडणुकीकरीता आज राष्ट्रवादी काँग्रेसच्यावतीने सुनेत्रा पवार यांनी उमेदवारीअर्ज दाखल केल्याची माहिती राष्ट्रवादीचे प्रदेशाध्यक्ष खासदार सुनिल तटकरे यांनी माध्यमांना दिली. राष्ट्रवादीच्या संसदीय मंडळाची बैठक बुधवारी रात्री...

लोकसभा निवडणुकीत मविआत मेरीटनुसार जागावाटप नाही!

लोकसभा निवडणुकीत महाविकास आघाडीला चांगले यश मिळाले असले तरी यापेक्षाही अधिक यश मिळू शकले असते. त्यामुळेच आता विधानसभा निवडणुकीत आघाडी म्हणून लढताना मेरीटनुसारच जागा वाटप झाले तर चांगला निकाल लागू शकतो. काँग्रेस महाविकास आघाडी म्हणूनच विधानसभा निवडणूक लढवणार असून...
error: Content is protected !!