शेतात हळद लावण्याआधी कोळपे वापरून सरी काढण्यासाठी बैलजोडी नाही म्हणून भावाला व मुलाला कोळप्याला जुंपणाऱ्या हिंगोली जिल्ह्यातले शेतकरी बालाजी पुंडगे यांना काल राज्याचे कृषी मंत्री धनंजय मुंडे यांनी त्यांच्या बांधावर बैलजोडी भेट पाठवली.
हिंगोली जिल्ह्यातल्या वसमत तालुक्याच्या शिरळे गावातील बालाजी पुंडगे या शेतकऱ्याकडे दोन एकर शेती आहे. दोन एकर शेतीसाठी बैलजोडी घेणे परवडत नाही आणि ऐनवेळेला कोणी बैल देत नाही म्हणून पावसाच्या भीतीने हळद लावण्यापूर्वी घाईगडबडीत सरी काढण्यासाठी त्याने स्वतःच्या भावाला व मुलाला चक्क कोळप्याला जुंपले होते. ही घटना दोन दिवसांपूर्वी घडली होती व या शेतकऱ्याला मदत करण्यासाठी काहींनी आवाहनही केले होते.
या आवाहनाची दखल घेत मंत्री धनंजय मुंडे यांनी कृषी विभागाचे अधिकारी व हिंगोली जिल्ह्यातील सहकारी यांच्या मदतीने या शेतकऱ्याची संपूर्ण माहिती जाणून घेतली. त्यानंतर काल मुंडे यांच्या वतीने बी. डी. बांगर हे थेट बैलजोडी घेऊन बालाजी पुंडगे यांच्या शेतात पोहोचले.
दरम्यान मुंडे यांनी बालाजी पुंडगे यांच्याशी दूरध्वनीवरून संवादही साधला. यावेळी धनंजय मुंडे यांनी आपण बैलजोडी पाठवत असून शेतातल्या कामांसाठी आपण कृषी विभागाकडे संबंधित योजनेतून ट्रॅक्टरसाठीही अर्ज करावा, असे पुंडगे यांना सांगितले. बालाजी पुंडगे यांनीसुद्धा आपल्या शेताबरोबरच इतरांच्या शेतामध्येसुद्धा काम करून आपण या बैलजोडीचा सांभाळ करू, असा शब्द मुंडे यांना दिला. यावेळी बी. डी. बांगर यांच्यासह स्थानिक पदाधिकारी व कृषी विभागाचे अधिकारी शिरळे गावात उपस्थित होते.