जॉनी जॉनी यस पापा..’च्या जमान्यात मुलांनाया बाई या, बघा बघा कशी माझी बसली बया..’ या बालगीतांकडे खेचून आणणारा उपक्रम चेंबूर येथील स्वामी मुक्तानंद हायस्कूलमध्ये साकारला जाणार आहे. ५ जानेवारीला सकाळी ११ वाजता. मंगेश पाडगावकर, ग. ह. पाटील, विजया वाड, निशिगंधा वाड, डॉ. विनोद इंगळहळ्ळीकर, एकनाथ आव्हाड अशा ३० प्रथितयश कवितांना गीतांचा साज दिला जाणार असून खासदार अरविंद सावंत या उपक्रमाचे उद्घाटन करणार आहेत.
डॉ. विजया वाड, आशाताई कुलकर्णी, विश्वनाथ खंदारे यांच्या पुढाकाराने याचे आयोजन करण्यात आले आहे. डॉ. विनोद इंगळहळ्ळीकरदेखील यावेळी भेट देतील. आपल्या मराठी साहित्यकांनी लहान मुलांसाठी समृद्ध केलेली साहित्यिक परंपरा परत त्यांच्यापर्यंत पोहोचवण्याचा हा अनोखा उपक्रम असून त्यातून साहित्याचा अनुभव घेण्याबरोबरच ती जोपासण्याचाही प्रयत्न केला जाणार आहे. अधिकाधिक साहित्यरसिकांनी तसेच बालकांनीही यावेळी उपस्थित राहवे, असे आवाहन डॉ. विजया वाड यांच्या वतीने करण्यात आले आहे.
