बनावट कागदपत्रान्वये मुख्यमंत्री सहाय्यता निधीमधून अर्थसहाय्य दिले गेल्याची कबुली मुख्यमंत्री सचिवालयाने आरटीआय कार्यकर्ते अनिल गलगली यांना नुकतीच दिली आहे. याबाबत मुख्यमंत्री सचिवालयाने ठाण्यातील त्या रुग्णालयावर गुन्हा दाखल करण्याबाबत पोलीस आयुक्तांना कळविले आहे.
![मुख्यमंत्री](https://kiranhegdelive.com/wp-content/uploads/2023/10/IMG-20231010-WA0009-e1697264420380-682x1024.jpg)
आरटीआय कार्यकर्ते अनिल गलगली यांनी मुख्यमंत्री सचिवालयाकडे मुख्यमंत्री सहाय्यता निधी अंतर्गत बोगस प्रकरण किंवा शासनाची फसवणूक केली आहे का, त्याची माहिती मागितली होती. मुख्यमंत्री सहाय्यता निधीचे सहाय्यक लेखा अधिकारी संजय तांबे यांनी गलगली यांना कळविले की, डॉ. अनुदूर्ग ढोणी गणपती मल्टीस्पेशालिटी हॉस्पिटल, आंबिवली पूर्व, ठाणे या रुगणालयाने बनावट कागदपत्रान्वये अर्थसहाय्य प्राप्त केल्याचे दिसून आले आहे. रुग्णालयातील डॉक्टर, कर्मचारी आणि डॉक्टरांच्या सान्निध्यात आलेल्या व्यक्ती यांचा संशय आल्याने पुढील चौकशी करुन आवश्यकतेनुसार गुन्हा दाखल करण्याबाबत पोलीस आयुक्त, बृहन्मुंबई यांना दिनांक. 06.11.2023च्या पत्रान्वये कळविण्यात आले आहे.
अनिल गलगली यांच्या मते, मुख्यमंत्री सहाय्यता निधीच्या माध्यमातून अर्थसहाय्य प्राप्त झाल्यानंतर लाभार्थ्यांची यादी संपूर्ण विवरणासहित संकेतस्थळावर प्रसिद्ध करण्याची आवश्यकता आहे. यामुळे अशी अनेक प्रकरणे बाहेर येतील आणि बोगसगिरीवर आळा बसेल. यामुळे खऱ्या लाभार्थ्यांना फायदा होईल.